"Modus legendi in dividendo constat."
"Meditatio est cogitatio frequens cum consilio, quae causam et originem, modum et utilitatem uniuscuiusque rei prudenter investigat."
"Principium ergo doctrinae est in lectione, consummatio in meditatione, quam si quis familiarius amare didicerit eique saepius vacare voluerit iucundam valde reddit vitam, et maximam in tribulatione praestat consolationem. Ea enim maxime est, quae animam a terrenorum actuum strepitu segregat, et in hac vita etiam aeternae quietis dulcedinem quodammodo praegustare facit. Cumque iam per ea quae facta sunt Eum qui fecit omnia quaerere didicerit et intelligere, tunc animum pariter et scientia erudit et laetitia perfundit, unde fit ut maximum in meditatione sit oblectamentum."
"Habet namque omnis tractatio aliquod principium, cui tota rei veritas vis sententiae innititur, et ad ipsum cunta alia referuntur. Hoc quaerere et considerare colligere est. Unus fons est et multi rivuli, quid anfractus fluminum sequeris? Tene fontem et totum habes."
"Ne nimium laeteris si multa legeris, sed si multa intellexeris, nec tantum intellexeris, sed retinere potueris."
In studio diligenti a caritate imperato, excellenter verificatur commune effatum: si radices scientiae sunt amarae, fructus ejus dulciores sunt et optimi. Hic agitur non de scientiae quae inflat, sed de ea quae sub influxu caritatis et virtutis studiositatis vere aedificat.